ໃນຕອນເຊົ້າຂອງວັນທີ 25 ມີນາ 2020 ຢູ່ຫ້ອງປະຊຸມຫ້ອງວ່າການປົກຄອງແຂວງ ໄດ້ຈັດກອງປະຊຸມປຶກສາຫາລື ການກະກຽມຄວາມພ້ອມ ແລະ ເຝົ້າລະວັງການແຜ່ລະບາດເຊື້ອພະຍາດໂຄວິດ 19 ໂດຍພາຍໃຕ້ການເປັນປະທານຂອງທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ, ມີການນຳຂອງແຂວງ, ພະນັກງານຫຼັກແຫຼ່ງ ແລະ ຄະນະສະເພາະກິດຂັ້ນແຂວງ ເຂົ້າຮ່ວມ.

     ກອງປະຊຸມ ທ່ານເຈົ້າແຂວງໄດ້ຜ່ານຄຳສັ່ງແນະນຳເລກທີ 015/ສພກ ລົງວັນທີ 24 ມີນາ 2020 ວ່າດ້ວຍການຈຳກັດບໍລິເວນສະຖານທີ່ພັກເຊົາຂອງຕົນເອງ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດ ໂຄວິດ 19 ໂດຍໃຫ້ທຸກພາກສ່ວນພ້ອມກັນຜັນຂະຫຍາຍຄຳສັ່ງສະບັບນີ້ ແລະ ເປັນເຈົ້າການໃນການປຸກລະດົມປະຊາຊົນທີ່ມີພີ່ນ້ອງ, ລູກ, ຫຼານ ຫຼື ສະມາຊິກໃນຄອບຄົວເດີນທາງມາແຕ່ຕ່າງປະເທດ ໃຫ້ປະຕິບັດມາດຕະການ ການຈຳກັດບໍລິເວນສະຖານທີ່ພັກເຊົາຂອງຕົນເອງຢ່າງເຂັ້ມງວດ ແລະ ເຄັ່ງຄັດ, ໃຫ້ແຕ່ລະແຂວງ, ເມືອງ ແລະ ແຕ່ລະບ້ານ ກຳນົດ ແລະ ຈັດສັນສະຖານທີ່ ທີ່ເໝາະສົມໄວ້ ເພື່ອນຳໃຊ້ໃນການຈຳກັດບໍລິເວນ ແລະ ກະກຽມຮັບມືຫາກເກີດການລະບາດຂອງພະຍາດ ໂຄວິດ 19 ຂຶ້ນ, ເກັບກຳຂໍ້ມູນລະອຽດຂອງປະຊາຊົນທີ່ເດີນທາງມາຈາກຕ່າງປະເທດ ເພື່ອເກັບກຳສະພາບອາການບຸກຄົນດັ່ງກ່າວຢ່າງໃກ້ຊິດ ແລະ ເປັນປົກກະຕິພາຍໃນ 14 ວັນ, ໃຫ້ແນະນໍາປະຊາຊົນຢູ່ແຕ່ລະບ້ານ ຫຼີກລ້ຽງການເດີນທາງທີ່ບໍ່ມີຄວາມຈຳເປັນຮີບດ່ວນ, ໃຫ້ອຳນາດການປົກຄອງທຸກຂັ້ນ ລະດົມທົ່ວສັງຄົມ ໃຫ້ຄວາມຮ່ວມມື ແລະ ເຂົ້າຮ່ວມຂະບວນການຄວບຄຸມ, ປ້ອງກັນ ແລະ ສະກັດກັ້ນການລະບາດຂອງພະຍາດ ໂຄວິດ 19 ໃນຄັ້ງນີ້ຢ່າງເປັນເຈົ້າການ ຫາກຜູ້ທີ່ຖືກຈຳກັດບໍລິເວນຕົນເອງ ບໍ່ປະຕິບັດຕາມມາດຕະການທີ່ຄະນະສະເພາະກິດກຳນົດໄວ້ພາຍໃນ 14 ວັນ ແມ່ນຈະຖືກດຳເນີນມາດຕະການຕາມລະບຽບກົດໝາຍ.

 

       ພ້ອມນີ້ ຍັງໄດ້ປຶກສາຫາລືກັນຢ່າງກົງໄປກົງມາ ແລະ ເຫັນດີເປັນເອກະພາບກັນໃຫ້ຄະນະສະເພາະກິດ ລົງປະຈຳຢູ່ບັນດາບ້ານທີ່ມີປະຊາຊົນ ເດີນທາງມາຈາກຕ່າງປະເທດ ເພື່ອຕິດຕາມອາການຂອງຜູ້ທີ່ສົງໃສຕິດເຊື້ອ ເພື່ອເຮັດໃຫ້ຜູ້ທີ່ມີອາການຄ້າຍຄຽງການຕິດເຊື້ອ ໄດ້ຮັບການປິ່ນປົວຕາມລະບຽບການ, ເຫັນດີໃຫ້ບັນດາພະແນກການ, ຫ້ອງການ ທີ່ມີພະນັກງານແອອັດ ໂດຍອະນຸຍາດໃຫ້ພັກການຊົ່ວຄາວຕາມຄວາມເໝາະສົມ, ພາກສ່ວນໃດຫາກຈຳເປັນໃນການຈັດກອງປະຊຸມ ຕ້ອງມີນ້ຳຢາລ້າງມື, ຜ້າອັດປາກ, ເຄື່ອງວັດແທກອຸນຫະພູມ ແລະ ຕ້ອງຢູ່ຫ່າງກັນ 2 ແມັດຂຶ້ນໄປ.

      ຕາມການລາຍງານເຂົ້າເຈົ້າໜ້າທີ່ສະເພາະກິດໄດ້ໃຫ້ຮູ້ວ່າ: ປະຊາຊົນທີ່ເດີນທາງເຂົ້າປະເທດຜ່ານດ່ານສາກົນປາກຊັນ-ບືງການ ທາງການຂອງແຂວງບໍລິຄຳໄຊ ບໍ່ໄດ້ກັກບໍລິເວນເປັນສູນລວມ ພາຍໃນ 14 ວັນ ແຕ່ທາງການແຂວງບໍລິຄຳໄຊ ໃຫ້ບຸກຄົນໄປພັກເຊົາຢູ່ເຮືອນຕົນເອງ ໂດຍປະຕິບັດຕາມຂໍ້ຫ້າມທີ່ໄດ້ກຳນົດໄວ້ ພ້ອມທັງມອບໝາຍໃຫ້ຄະນະສະເພາະກິດຂັ້ນແຂວງ, ເມືອງ ແລະ ບ້ານ ຕິດຕາມເປົ້າໝາຍ ບຸກຄົນທີ່ເດີນທາງມາຈາກຕ່າງປະເທດຢ່າງໄກ້ສິດ ເພື່ອຮັບປະກັນການແຜ່ລະບາດຂອງພະຍາດ.