ກອງປະຊຸມໃຫຍ່ຄັ້ງທີ  II ຄະນະພັກຮາກຖານພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ໄດ້ຈັດຂຶ້ນໃນຕອນບ່າຍຂອງວັນທີ 20 ມີນາ 2020 ຢູ່ຫ້ອງປະຊຸມພະແນກຂອງຕົນ ໂດຍພາຍໃຕ້ການເປັນປະທານຂອງສະຫາຍ ສົມສະຫງວນ ສຸວັນນະລາດ ເລຂາຄະນະພັກຮາກຖານພະແນກ ສຊ ແຂວງ, ເປັນກຽດເຂົ້າຮ່ວມຂອງສະ​ຫາຍ ບຸນ​ຄຳ ​ໄຊ​ເຍ່ຍລໍ​ວື່ ຄະນະ​ປະຈຳພັກແຂວງ ປະທານກວດກາພັກ-ລັດແຂວງ, ມີສະມາຊິກພັກສົມບູນ 68 ສະຫາຍ ຍິງ 19 ສະຫາຍ ແລະ ແຂກຖືກເຊີນຈາກພະແນກການອ້ອມຂ້າງ ເຂົ້າຮ່ວມ.

          ສະຫາຍ ສົມສະຫງວນ ສຸວັນນະລາດ ໄດ້ຂຶ້ນຜ່ານຮ່າງບົດລາຍງານການເມືອງທັງສອງພາກ ໃນໄລຍະ 5 ປີຜ່ານມາ ວ່າ: ຮາກຖານພັກພະແນກ ຊສ ແຂວງ ໃນ​ປະຈຸ​ບັນຊີ້ນໍາ 4 ໜ່ວຍພັກຄື ໜ່ວຍພັກບໍລິຫານ-ຈັດຕັ້ງ ແລະ ກວດກາ, ໜ່ວຍພັກສິ່ງແວດລ້ອມ-ແຜນການ ແລະ ຂໍ້ມູນຂ່າວສານ, ໜ່ວຍພັກຄຸ້ມຄອງທີ່ດິນ ແລະ ໜ່ວຍພັກຊັບພະຍາກອນນໍ້າ ແລະ ຕິດຕາມກວດກາ ຊສ, ​ປະກອບ​ມີ​ສະມາ​ຊິກ​ພັກທັງ​ໝົດ 71 ສະຫາຍ, ຍິງ 19ສ/ຫ, ໃນໄລຍະຜ່ານມາ ຂະແໜງຈັດຕັ້ງ ແລະ ພະນັກງານ ແມ່ນໄດ້ຈັດຕັ້ງປະຕິບັດວຽກງານບົນພື້ນຖານຕາມກົດໝາຍວ່າດ້ວຍພະນັກງານ-ລັດຖະກອນ, ນອກຈາກນັ້ນ ກໍ່ໄດ້ປະຕິບັດຕາມລະບຽບ, ຄຳແນະນຳ ແລະ ນິຕິກຳຕ່າງໆເປັນອັນສຳຄັນ ການມອບວຽກງານການສ້າງສັນຍາສໍາປະທານທີ່ດິນລັດໃຫ້ພະແນກການເງິນແຂວງ, ເກັບລາຍຮັບວຽກງານການຈົດທະບຽນ, ເກັບຄ່າທໍານຽມ ແລະ ຄ່າບໍລິການວິຊາການ ປະຕິບັດໄດ້ 22.352 ຄັ້ງ, ໄດ້ດໍາເນີນໃນຈຳນວນ 6 ບ້ານມີຕອນດິນ 4.292 ຕອນ ໄດ້ 98,66% ທຽບໃສ່ແຜນ 5 ປີ (4.350ຕອນ), ໃນທົ່ວແຂວງ ​ອອກ​ໃບ​ຕາດິນ ໄດ້ 24.338 ຕອນ ເທົ່າ 86,92% ຂອງແຜນ 5 ປີ, ສັງລວມການສ້າງສຳມະໂນທີ່ດິນຂອງບັນດາເມືອງ ທົ່ວແຂວງ ມີສໍາມະໂນທີ່ດິນທັງໜົດ 120.579 ຕອນ, ໄດ້ສ້າງຄວາມເຂັ້ມແຂງທາງດ້ານວິຊາການ ໂດຍການຝຶກອົບຮົມໃນການນໍາໃຊ້ໂປຮແກມລາວແລນເລັກໃຫ້ພະນັກງານທີ່ດິນທົ່ວແຂວງ, ອອກໃບຢັ້ງຢືນໃຫ້ບັນດາໂຄງການລົງທຶນໄດ້ 127 ໂຄງການ ແລະ ສາມາດຊຸກຍູ້ໃຫ້ບັນດາໂຄງການປັບປຸງແຜນຄຸ້ມຄອງ ແລະ ຕໍ່ເອກະສານໄດ້ 180 ໂຄງການ, ລົງແກ້ໄຂບັນດາຄຳຮ້ອງຟ້ອງ ຫາງສຽງຂອງປະຊາຊົນຕໍ່ຜົນກະທົບຈາກໂຄງການໄດ້ 56 ບັນຫາ, ເກັບກໍາ ແລະ ສົ່ງຂໍ້ມູນອຸຕຸນິຍົມ ອຸທົກກະສາດ ໃຫ້ກົມອຸຕຸ ແລະ ສະຖານີໂທລະພາບແຂວງໄດ້ 365 ຄັ້ງ, ລົງສໍາຫຼວດດິນບໍລິເວນນໍ້າ 6 ເມືອງ  ຈໍານວນ  80 ແຫ່ງ, ການຂຽນແຜນຄຸ້ມຄອງອ່າງນໍ້າເທີນກະດິງ ສາມາດ ປະຕິບັດໄດ້ 93%, ກໍານົດຈຸດກວດກາຕິດຕາມຄຸນນະພາບນໍ້າທົ່ວແຂວງ ໄດ້ 21 ຈຸດ ແລະ ຕິດຕາມເປັນປົກກະຕິ, ສໍາເລັດໃນການເຜິຍແຜ່ ກົດໜາຍນໍ້າ , ກົດໜາຍອຸຕຸ ຂັ້ນ ແຂວງ ແລະ ຂັ້ນເມືອງ.

ກອງປະຊຸມ ຍັງໄດ້ປ່ອນບັດຄັດເລືອກເອົາຄະນະພັກຊຸດໃໝ່ ເຊິ່ງມີຜູ້ສະໝັກ 7 ສະຫາຍ ເລືອກເອົາ 5 ສະຫາຍ ຜ່ານການປ່ອນບັດ ສາມາດເລືອກໄດ້ສະຫາຍ ສົມ​ສະຫງວນ ສຸວັນນະ​ລາດ ເປັນເລຂາຄະນະພັກຮາກຖານ, ສະຫາຍ ອຸທອນ ສິງຫາດ​ວງປັນຍາ ເປັນຮອງເລຂາຄະນະພັກຮາກຖານ, ສະຫາຍ ວຽງ​ແກ້ວ ​ໄຊ​ພັກດີ, ສະຫາຍ ພູມີ​ພົນ ສຸວັນ​ນາລາ​ດ ແລະ ສະຫາຍ ລົມ​ເຢັນ ສີ​ສຸ​ວົງ      ເປັນຄະນະ. ພ້ອມນີ້ ກອງປະຊຸມຍັງໄດ້ປ່ອນບັດເອົາຜູ້ແທນ ໄປຮ່ວມກອງປະຊຸມໃຫຍ່ຄັ້ງທີ 7 ຂອງແຂວງ.