ໃນຕອນເຊົ້າວັນທີ 19 ມີນາ 2020 ຢູ່ທີຫ້ອງປະຊຸມຊັ້ນ III ຂອງຫ້ອງວ່າການປົກຄອງເມືອງ ວຽງທອງ, ແຂວງ ບໍລິຄໍາໄຊ ທີມງານອົງການກາແດງແຂວງບໍລິຄໍາໄຊ ສົມທົບກັບຫ້ອງການ ຮສສ ເມືອງວຽງທອງ ໄດ້ເປີດຮັບບໍລິຈາກເລືອດແບບຄວາມສະໝັກໃຈ ໂດຍບໍ່ຮຽກຮ້ອງເອົາຄ່າຕອບແທນ ເປັນກຽດເຂົ້າຮ່ວມ ຂອງ ທ່ານ ສົມພອນ ລາດຊະວົງ ຫົວໜ້າຫ້ອງການແຮງງານ ແລະ ສະຫວັດດີການສັງຄົມເມືອງ, ທ່ານ ບຸນຍົງ ປັນຍານຸວົງ ຮອງອົງການກາແດງແຂວງ ບໍລິຄໍາໄຊ, ມີຫົວໜ້າຫ້ອງການ, ຮອງຫ້ອງການ, ພະນັກງານລັດ-ຖະກອນ ເຂົ້າຮ່ວມ.

      ທ່ານ ບຸນຍົງ ປັນຍານຸວົງ ໄດ້ຍົກໃຫ້ເຫັນຄວາມສໍາຄັນ ແລະ ຈຳເປັນຂອງເລືອດ ທີ່ສາມາດຊ່ວຍເຫລືອ ແລະ ກອບກູ້ເອົາຊີວິດຂອງເພື່ອນມະນຸດດ້ວຍກັນ ທີ່ກຳລັງໄດ້ຮັບບາດເຈັບ ຫລື ເຈັບເປັນ ກຳລັງລໍຄອຍເລືອດ ເພື່ອຊ່ວຍຊີວິດພວກເຂົາ, ການບໍລິຈາກເລືອດ ຈຶ່ງປຽບເໝືອນການຊ່ວຍເຫລືອກອບກູ້ເອົາຊີວິດເພື່ອນມະນຸດ ໃຫ້ລອດຈາກຄວາມຕາຍ ຈຶ່ງຖືໄດ້ວ່າ ການບໍລິຈາກເລືອດ ແມ່ນການສ້າງບຸນກຸສົນອັນໃຫຍ່ຫລວງ.

ໃນພິທີ ໄດ້ມີຜູ້ບໍລິຈາກເລືອດ 7 ທ່ານ, ໄດ້ເລືອດທັງໝົດ 7 ຖົງ.

   ເພື່ອຕອບບຸນແທນຄຸນໃຫ້ແກ່ບັນດາທ່ານທີ່ໄດ້ປະກອບສ່ວນບໍລິຈາກເລືອດ ອົງການກາແດງແຂວງບໍລິຄໍາໄຊໄດ້ຕົກລົງມອບໃບຍ້ອງຍໍ ໃຫ້ຜູ້ທີ່ບໍລິຈາກເລືອດເພື່ອຊ່ວຍເຫຼືອສັງຄົມ.